Inzaghi, nga ku do të dëshironit të nisnit? "Me një mendim për Franco Baresin. Ai ishte idhulli i babait tim dhe i gjithë familjes sime. Në vitin 1983, shkoja në 'San Siro' për ta parë duke luajtur në 'Mundialito'. Do të kisha dashur shumë të merrja pjesë në funeralin e tij, por fatkeqësisht isha duke udhëtuar drejt Australisë. Kështu që, në vend të kësaj, shkova të bëja homazhe te muralja kushtuar atij këtu në qytet." A u prekët nga pritja që ju bënë në Perth? "Të emocionohesh në atë mënyrë në moshën time është një nga dhuratat më të bukura që më ka dhënë futbolli. Kur pashë gjithë ata njerëz, fillimisht mendova se kishin ardhur për Milanin. Pastaj e kuptova... Disa mbanin veshur fanellën e finales së Ligës së Kampionëve në Athinë, një fanellë që mbetet në zemrat e të gjithëve ne. Sigurisht edhe në timen. Të shënosh dy gola në një finale të Ligës së Kampionëve është diçka vërtet e veçantë." Finalja me Liverpool? "Ajo që është interesante është se isha i dëmtuar për finalen e Stambollit, ndaj fati vërtet më dha një mundësi të dytë. Atina ishte një natë e paharrueshme." Disa fjalë për Milanin aktual dhe merkato: "Shpresoj që AC Milan, me trajnerin e tyre të ri dhe nënshkrimet e rëndësishme që kanë bërë, të mund të konkurrojnë deri në fund. Historia na tregon se Milani i përket atij niveli "Goncalo Ramos dhe Gila janë nënshkrime të shkëlqyera. Gonçalo lëviz shumë mirë dhe ka gola në gjak. Shpresojmë që ai të jetë sulmuesi që Milani ka kërkuar dhe që fanella me numër 9 më në fund t'i sjellë fat të mirë." Që kur u larguat, vetëm Olivier Giroud e ka thyer vërtet të ashtuquajturin 'mallkim' të fanellës me numër 9 të Milanit: "Njerëzit bëjnë shaka shumë për këtë. Shpresoj që Ramos të shkojë mirë që më në fund të mos flasim më për të."